ഒക്‌ടോബർ ഒന്നിന് മുൻപ് വാഹനങ്ങൾ ശൈത്യകാല യാത്രയ്‌ക്ക് സജ്ജമാക്കണം, മുന്നറിയിപ്പുമായി ബി സി സർക്കാർ

 

ബ്രിട്ടീഷ് കൊളംബിയയിൽ ഒക്‌ടോബർ ഒന്നിന് മുൻപായി വാഹനങ്ങൾ ശൈത്യകാല യാത്രയ്‌ക്ക് സജ്ജമാക്കണമെന്ന് ഡ്രൈവർമാർക്ക് മുന്നറിയിപ്പ്. ഒക്‌ടോബർ ഒന്ന് മുതൽ പ്രവിശ്യയിലെ ഭൂരിഭാഗം ഹൈവേകളിലും വിന്റർ ടയറുകളോ ചെയിനുകളോ നിർബന്ധമാക്കിയിട്ടുണ്ട്. റോഡുകൾക്ക് അനുസരിച്ച് അടുത്ത വർഷം മാർച്ച് 31 വരെയോ ഏപ്രിൽ 30 വരെയോ ഈ നിയമം പ്രാബല്യത്തിലുണ്ടാകും.

താരതമ്യേന കുറഞ്ഞ തണുപ്പുള്ള കാലാവസ്ഥയായതിനാൽ ലോവർ മെയിൻലാൻഡിലും തെക്കുകിഴക്കൻ വാൻകൂവർ ഐലൻഡിലും ഈ നിയമത്തിൽ ഇളവുണ്ട്. എന്നാൽ ലോവർ മെയിൻലാന്റിൽ നിന്ന് ഹൈവേ 99-ലെ ഹോഴ്‌സ്ഷൂ ബേയോ ഹൈവേ 1-ലെ ലൈഡ്‌ലോയോ കടന്ന് യാത്ര ചെയ്യണമെങ്കിൽ വിന്റർ ടയറുകൾ നിർബന്ധമാണ്. കൂടാതെ മൗണ്ട് സീമോർ, സൈപ്രസ് മൗണ്ടൻ എന്നിവിടങ്ങളിലേക്ക് പോകാനും ഒക്‌ടോബർ ഒന്ന് മുതൽ വിന്റർ ടയറുകൾ വേണം. പ്രാദേശിക നഗരസഭകൾക്കും സ്വകാര്യ റോഡുകൾക്കും വിന്റർ ടയറുകളുമായി ബന്ധപ്പെട്ട് സ്വന്തമായ നിയമങ്ങളുണ്ടാകാം. ടയറിലെ ഗ്രിപ്പിന്റെ അളവ് കുറഞ്ഞത് 3.5 മില്ലീമീറ്റർ വേണമെന്നാണ് നിയമമെങ്കിലും, അപകടങ്ങൾ ഒഴിവാക്കാൻ 6.5 മില്ലീമീറ്ററെങ്കിലും ഉള്ള ടയറുകൾ ഉപയോഗിക്കുന്നതാണ് കൂടുതൽ സുരക്ഷിതം.

താപനില ഏഴ് ഡിഗ്രി സെൽഷ്യസിന് താഴേക്ക് പോകുമ്പോൾ ഇത്തരം ടയറുകൾ റോഡിൽ മികച്ച ഗ്രിപ്പും നിയന്ത്രണവും നൽകുകയും ബ്രേക്കിംഗ് ദൂരം 33 ശതമാനം വരെ കുറയ്ക്കുകയും ചെയ്യും. നാല് ചക്രങ്ങളിലും ഒരേപോലെയുള്ള വിന്റർ ടയറുകൾ ഘടിപ്പിക്കാനും, തേയ്മാനമോ കേടുപാടുകളോ ഉണ്ടെങ്കിൽ വിദഗ്ദ്ധരെക്കൊണ്ട് പരിശോധിപ്പിക്കാനും, തണുപ്പുകാലത്ത് എയർ പ്രഷർ കൃത്യമായി പരിശോധിക്കാനും ഡ്രൈവർമാർക്ക് നിർദ്ദേശമുണ്ട്.